का रउवा चीनी छोड़ सकेनी? देखल जाव एकर गजब के फायदा!

अगर हमनी अपना खाना से चीनी के हटा देब त हमनी के शरीर के बहुत फायदा हो सकता। 

आईं एक-एक क के समझीं कि चीनी कम क के हमनी के शरीर में कवन बदलाव होखेला अवुरी इ हमनी के स्वास्थ्य खाती कईसे फायदेमंद हो सकता।

वजन कम करे में मदद करेला

अगर हमनी चीनी जादा खाएनी जा त हमनी के वजन तेजी से बढ़ जाला। खास तौर प चीनी के जादा खईला से पेट के आसपास चर्बी जमा हो जाला, जवना के पेट के चर्बी भी कहल जाला।

इ चर्बी हमनी के शरीर के भीतरी अंग के घेर लेवेले अवुरी दिल के बेमारी, स्ट्रोक अवुरी डायबिटीज के खतरा बढ़ा देवेले।

अगर हमनी के अपना खानपान से चीनी कम क देनी जा त शरीर में जमा चर्बी धीरे-धीरे कम होखे लागेला अवुरी वजन कम होखे लागेला।

ब्लड शुगर के नियंत्रित करेला

हमनी के शरीर में इंसुलिन नाम के हार्मोन बनेला जवन कि भोजन से मिलेवाला चीनी के शरीर के कोशिका में पहुंचावे के काम करेला। लेकिन जब हमनी के चीनी के जादा खाएनी जा त शरीर के जादा इंसुलिन बनावे के पड़ेला।

धीरे-धीरे शरीर के इंसुलिन संवेदनशीलता कम हो जाला जवना के इंसुलिन प्रतिरोध कहल जाला। एकरा से डायबिटीज हो सकता।

अगर हमनी के अपना खानपान में चीनी कम करी त शरीर में इंसुलिन के जरूरत कम होई अवुरी ब्लड शुगर के स्तर संतुलित रही, जवना से डायबिटीज के खतरा भी कम हो जाई।

दाँत के स्वस्थ राखेला

हमनी के मुंह में कुछ बैक्टीरिया होखेला, जवन कि खाना में मौजूद चीनी के एसिड में बदल देवेला। इ एसिड हमनी के दांत के ऊपरी परत के नुकसान पहुंचावेला, जवना से मसूड़ा में समस्या हो सकता।

लेकिन, जदी हमनी के अपना खानपान में चीनी के मात्रा कम करी त दांत बहुत दिन तक मजबूत अवुरी स्वस्थ रही।

मूड आ मानसिक स्वास्थ्य में सुधार करेला

हमनी के जवन खानी जा ओकर असर सिर्फ शरीर प ना, बालुक हमनी के दिमाग अवुरी मनोदशा प भी पड़ेला। शोध के मुताबिक चीनी के जादा खईला से कुछ लोग में अवसाद अवुरी तनाव बढ़ सकता।

अयीसन ए चलते होखेला काहेंकी चीनी के जादा खईला से शरीर में ब्लड शुगर के स्तर में बहुत तेजी से उतार-चढ़ाव होखेला, जवना के चलते मूड में भी बदलाव होखेला। अगर हमनी के चीनी कम खाईं जा त हमनी के मन अउरी स्थिर अवुरी शांत रही, जवना से हमनी के खुश अवुरी सक्रिय भी होई।

त्वचा के साफ आ जवान रखेला

चीनी के जादा खईला से शरीर में सूजन बढ़ सकता। एकरा चलते त्वचा में जादा तेल बनेला, जवना के चलते त्वचा प पिंपल्स अवुरी मुँहासा होखेला।

एकरा अलावे चीनी के जादा खईला से त्वचा के कोलेजन के उत्पादन कमजोर हो जाला, जवना के चलते चेहरा प जल्दी झुर्री भी हो सकता। अगर हमनी के अपना खाना में चीनी कम करी त त्वचा साफ, स्वस्थ अवुरी जादे चमकदार देखाई दिही।

 लिवर के स्वस्थ रखेला 

हमनी के लिवर शरीर में चीनी के प्रोसेस करेला। अगर हमनी के ज्यादा चीनी खानी जा त इ चीनी फ्रुक्टोज में बदल जाला अवुरी हमनी के लिवर में चर्बी जमा हो जाला।

जब लिवर में बहुत जादा चर्बी जमा हो जाला त नॉन अल्कोहोलिक फैटी लिवर डिजीज नाम के बेमारी हो सकता। इ लिवर खातिर बहुत नुकसानदेह होखेला।

अगर हमनी के चीनी के खपत कम करीले त लिवर प काम के दबाव कम हो जाला अवुरी उ बेहतर काम करे में सक्षम होखेला।

दिल के स्वास्थ्य खातिर फायदेमंद बा

चीनी के जादा खईला से शरीर में Triglycerides बढ़ जाला, जवना से दिल के बेमारी के खतरा बढ़ सकता।

एकरा संगे-संगे चीनी के जादा खईला से ब्लड प्रेशर अवुरी बैड कोलेस्ट्रॉल भी बढ़ सकता, जवन कि दिल के धमनियन के नुकसान पहुंचा सकता।

अगर हमनी के चीनी के सेवन कम करीले त दिल स्वस्थ रहेला, ब्लड प्रेशर सामान्य रहेला अवुरी हार्ट अटैक जईसन समस्या के खतरा भी कम हो जाला।

त, जदी आप अपना स्वास्थ्य के बढ़िया से देखभाल कईल चाहतानी त निश्चित रूप से अपना आहार में चीनी के मात्रा के कम करे के कोशिश करीं।

Source:- 1. https://pmc.ncbi.nlm.nih.gov/articles/PMC10074550/ 

2. https://www.nih.gov/news-events/nih-research-matters/early-life-sugar-intake-affects-chronic-disease-risk 

3. https://pmc.ncbi.nlm.nih.gov/articles/PMC9323357/ 

4. https://newsinhealth.nih.gov/sites/nihNIH/files/2014/October/NIHNiHOct2014.pdf 

5. https://pmc.ncbi.nlm.nih.gov/articles/PMC9966020/